«Роднае слова – святы ізумруд,”- так пісаў пра мову Уладзімір Караткевіч. Хіба можна прыдумаць лепшае параўнанне, каб перадаць каштоўнасць гэтага скарба? Жыве мова – жыве народ. І пакуль кожны беларус будзе разумець гэта, наша мова будзе гучаць, квітнець. Слова – самае цудоўнае, што ў нас ёсць. Таму добрай традыцыяй у нашай школе стала святкаванне Міжнароднага дня роднай мовы, які адзначаецца 21 лютага.
Яшчэ за тыдзень да свята ўсіх педагогаў і вучняў школы запрасілі святкаваць Міжнародны дзень мовы разам. А 21 лютага з раніцы ў фае школы прайшла акцыя “Мае любімыя беларускія словы”. Настаўнікі і вучні пісалі беларускія словы, якія ім падабаюцца. Тут жа размяшчаліся выставы “Мая мова – мой гонар”, “У свеце беларускіх твораў”.
Да гэтага дня настаўнікамі беларускай мовы і бібліятэкарамі былі наладжаны ў кабінетах беларускай мовы і бібліятэцы выставы мастацкай літаратуры і перыёдыкі, аформлены стэнды з выказваннямі пра беларускую мову, падрыхтаваны калажы «Звыклыя рэчы па-беларуску».
Напярэдадні свята было праведзена анкетаванне вучняў 7-8, 9-11 класаў. На жаль, з анкетавання бачна, што вучні размаўляюць на беларускай мове толькі на ўроках. Тым не менш, большая частка з іх лічыць, што беларуская культура не можа існаваць без роднай мовы.
Завяршэннем свята стала чытанне вершаў беларускіх аўтараў вучнямі і настаўнікамі. З замілаваннем і любасцю гучалі розныя па тэматыцы вершы.
Спадзяемся, што свята роднай мовы запомнiцца надоўга.
Фотоотчет